متقی از آغاز تحقیقات طالبان درباره رویدادهای امنیتی در مرز افغانستان و تاجیکستان خبر داد
امیرخان متقی، وزیر خارجه طالبان، اعلام کرد که این گروه بررسیهای جدی را در پیوند به حملات اخیر در مناطق مرزی افغانستان و تاجیکستان آغاز کرده است.
آقای متقی امروز (شنبه، ۶ جدی) در یک مراسم در کابل گفت که در این زمینه با وزیر خارجه تاجیکستان گفتوگو کرده و دو طرف بهگونه مشترک تلاش دارند تا از تکرار چنین رویدادهایی جلوگیری شود.
به گفته او، نگرانی طالبان این است که برخی گروههای «مغرض» در تلاشاند روابط میان طالبان و تاجیکستان را تخریب کرده و وضعیت امنیتی را بیثبات سازند. وی تأکید کرد که طالبان با تمامی کشورهای همسایه همکاری میکنند تا از خاک افغانستان علیه هیچ کشوری استفاده نشود.
این در حالی است که در هفتههای اخیر، مناطق مرزی افغانستان و تاجیکستان شاهد چندین رویداد امنیتی بوده است. کمیته امنیت ملی تاجیکستان اعلام کرده که سهشنبه هفته گذشته، افراد مسلح با عبور از مرز افغانستان وارد منطقه قاووق ولسوالی شمسالدین شاهین ولایت ختلان شدند.
براساس اعلام این کمیته، در جریان عملیات نیروهای امنیتی تاجیکستان علیه این افراد، سه مهاجم مسلح و دو سرباز تاجیکستانی کشته شدند.
این رویداد سومین حمله مسلحانه از خاک افغانستان به مناطق مرزی تاجیکستان در یک ماه اخیر عنوان شده است. پیش از این نیز در حملات مشابه، شماری از شهروندان چین در تاجیکستان جان باخته بودند.
کمیته امنیت ملی تاجیکستان این حملات را نشانهای از عدم پایبندی طالبان به تعهداتشان در زمینه مبارزه با گروههای تروریستی دانسته است.
