هشدار چین به شهروندان و شرکتهایش درباره ناامنی در مرز تاجیکستان با افغانستان
چین از شهروندان و شرکتهای خود خواسته است به دلیل افزایش ناامنی در مناطق مرزی تاجیکستان با افغانستان، از حضور و فعالیت در این مناطق خودداری کنند.
شبکه الجزیره شامگاه جمعه، ۵ جدی، گزارش داد که سفارت چین در دوشنبه با نشر اعلامیهای گفته است حملات اخیر در نوار مرزی تاجیکستان، جان شهروندان چینی و پروژههای اقتصادی این کشور را با تهدید جدی روبهرو کرده است. در این اعلامیه از دولت تاجیکستان خواسته شده تا تدابیر لازم برای تأمین امنیت شهروندان و سرمایهگذاریهای چین را روی دست گیرد.
به نوشته الجزیره و به نقل از منابع تاجیکستانی، در جریان هفته جاری دستکم سه حمله مسلحانه از سوی تفنگداران ناشناس از ولایت بدخشان افغانستان به داخل خاک تاجیکستان صورت گرفته که در پی آن، شماری از قربانیان از جمله کارکنان شرکتهای چینی گزارش شدهاند.
این تحولات در حالی رخ میدهد که پیش از این نیز حملات مشابهی علیه شهروندان و شرکتهای چینی در مناطق مرزی افغانستان و پاکستان گزارش شده بود؛ مسألهای که نگرانیها درباره تأثیر ناامنیها بر پروژههای اقتصادی چین در منطقه را افزایش داده است.
