منابع: هیئت تاجیکستان با رئیس‌وزیران و رئیس استخبارات طالبان دیدار کرده است
منابع آگاه گزارش داده‌اند که هیئت ۱۴ نفری تاجیکستان که از چهار روز پیش در کابل حضور دارد، افزون بر دیدار با برخی مقام‌های طالبان، با رئیس وزیران و رئیس استخبارات این گروه نیز دیدار و گفتگو کرده است. طالبان تاکنون جزئیات این ملاقات‌ها را منتشر نکرده‌اند.
این هیئت پیش‌تر با وزیران خارجه و امور سرحدات طالبان دیدار کرده و طبق خبرنامه‌های رسمی، در این دیدارها درباره امنیت، توسعه روابط دوجانبه، چالش‌های مرزی، قاچاق مواد مخدر و تثبیت مرز افغانستان و تاجیکستان گفتگو شده است. وزارت سرحدات طالبان در بیانیه خود نوشته است: «در این دیدار، هیئت‌های هر دو کشور در مورد امنیت، گسترش روابط، مشکلات سرحدی و تثبیت سرحد مشترک گفتگو نمودند.»
این سفر، نخستین حضور یک هیئت رسمی تاجیکستان در کابل پس از چهار سال حاکمیت طالبان در افغانستان است. طالبان تاکنون درباره جزئیات مذاکرات امنیتی و مرزی اطلاعاتی ارائه نکرده‌اند، اما پیش‌تر درباره تهدیدهای فرامرزی به ویژه از جانب داعش خراسان ابراز نگرانی کرده‌اند.
به گفته بسم‌الله تابان، کارشناس امنیتی، «تهدیدات ناشی از افغانستان، به ویژه تروریسم، قاچاق مواد مخدر و سلاح، سبب شده که تاجیکستان نگرانی جدی نسبت به وضعیت افغانستان داشته باشد.»
هیئت تاجیکستان شامل مقام‌های امنیتی، اطلاعات و وزارت خارجه این کشور به‌همراه فرستاده ویژه تاجیکستان است. برخی کارشناسان معتقدند این تماس پس از چهار سال، نشان‌دهنده تلاش تاجیکستان برای حفظ تعامل و ایجاد روابط با طالبان است.
در عین حال، کشورهای آسیای میانه به جز تاجیکستان، تعامل نزدیک با طالبان داشته‌اند. تاجیکستان سفارت افغانستان را در اختیار دیپلمات‌های دولت پیشین قرار داده و همواره خواستار تشکیل دولت فراگیر در افغانستان بوده است. روسیه نیز اعلام کرده که تاجیکستان تاکنون مانع حضور طالبان در سازمان همکاری شانگهای شده است.
