منابع: هیئت تاجیکستان با امیر خان متقی وزیر خارجه طالبان دیدار کرده است
منابعی در وزارت خارجه طالبان گفته‌اند که هیئت بلندپایه تاجیکستان در جریان سفر به کابل تاکنون با امیرخان متقی، سرپرست وزارت خارجه طالبان، دیدار کرده و قرار است با محمدحسن آخند، رئیس‌وزیران طالبان، و عبدالحق وثیق، رئیس استخبارات طالبان نیز دیدار کند.
به گفته این منابع، برنامه دیدارهای بعدی این هیئت با مقام‌های ارشد طالبان نهایی شده است.
این سفر نخستین حضور یک هیئت بلندپایه تاجیکستان در افغانستان تحت حاکمیت طالبان و آخرین سفر یک کشور آسیای میانه به کابل محسوب می‌شود.
منابع طالبان گفته‌اند که این هیئت شامل ۱۴ مقام تاجیک، از جمله مقام‌های امنیتی، استخباراتی، وزارت خارجه و سایر نهادهای حکومتی تاجیکستان است.
تاجیکستان که تاکنون برخلاف دیگر کشورهای آسیای میانه از برقراری رابطه با طالبان خودداری کرده بود، روز گذشته یک هیئت عالی‌رتبه را به کابل اعزام کرد.
برخی تحلیلگران سیاسی معتقدند که سفر این هیئت می‌تواند آغاز گفت‌وگوهای سیاسی و تلاش تاجیکستان برای پیگیری منافع خود در افغانستان باشد.
هرچند جزییات رسمی دیدارها منتشر نشده، اما هدف اصلی این سفر تقویت همکاری‌های سیاسی و امنیتی با طالبان اعلام شده است.
ترکیب این هیئت شامل معاون اول نیروهای سرحدی کمیته امنیت ملی تاجیکستان، فرستاده ویژه وزارت خارجه، فرمانده مرزبانی، کارشناس ارشد امنیت ملی، معاون اول ولایت بدخشان تاجیکستان و چند مقام امنیتی دیگر است.
این سفر در حالی انجام می‌شود که چندی پیش یوسف وفا، والی طالبان در بلخ و از چهره‌های نزدیک به رهبری طالبان، به تاجیکستان سفر کرده بود. همچنین وزیر دفاع تاجیکستان در سفر اخیرش به پاکستان با مقام‌های آن کشور درباره وضعیت امنیتی افغانستان رایزنی کرده است.
شماری از کارشناسان نظامی بر این باورند که نگرانی‌های امنیتی، به‌ویژه تهدید قاچاق مواد مخدر، سلاح و فعالیت گروه‌های هراس‌افکن در مرزهای افغانستان، تاجیکستان را به سمت تعامل با طالبان سوق داده است.
بسم‌الله تابان، کارشناس نظامی، گفته است: «تهدیدات ناشی از خاک افغانستان، به‌ویژه قاچاق سلاح و مواد مخدر و فعالیت گروه‌های تروریستی، باعث شده که تاجیکستان نگرانی جدی نسبت به شرایط کنونی داشته باشد.»
تاجیکستان در چهار سال گذشته هیچ رابطه دیپلماتیک رسمی با طالبان نداشته و سفارت این کشور در کابل بسته بوده است. علاوه بر این، دوشنبه نه‌تنها سفارت افغانستان را به طالبان نسپرده، بلکه از مخالفان آنان، از جمله اعضای جبهه مقاومت، نیز میزبانی کرده است.
در حال حاضر نیز سفارت افغانستان در تاجیکستان توسط دیپلمات‌های حکومت پیشین اداره می‌شود.
