منابع: طالبان خواستار به رسمیت‌شناسی از هیئت تاجیکستانی شده اند
منابع مطلع در وزارت خارجه طالبان گفته‌اند که این گروه در جریان دیدارهای اخیر با هیئت بلندپایه تاجیکستان در کابل، خواستار به‌رسمیت‌شناسی رسمی و همچنین واگذاری سفارت افغانستان در دوشنبه به طالبان شده‌اند. با وجود این درخواست‌ها، به گفته منابع، هیئت تاجیکستان تاکنون پاسخ قاطع و مشخصی ارائه نکرده است.
این هیئت که از ۱۴ مقام دولتی تاجیکستان تشکیل شده، به رهبری نماینده ویژه این کشور برای افغانستان به کابل سفر کرده است. تاجیکستان در چهار سال گذشته از کشورهای مهم حامی مخالفان سیاسی و نظامی طالبان محسوب می‌شد و همچنان تنها کشور همسایه افغانستان است که سفارت را به طالبان تسلیم نکرده است.
منابع می‌گویند اعضای هیئت تاجیکستان در جریان سفر پنج روزه‌شان با مقام‌های ارشد طالبان، از جمله رئیس‌وزیران، وزیر دفاع، وزیر خارجه، رئیس ستاد ارتش، وزیر سرحدات و رئیس استخبارات دیدار و گفتگو کرده‌اند.
به اساس اطلاعات ارائه‌شده، محور گفت‌وگوهای هیئت تاجیکستان بیشتر بر موضوعاتی چون تبادل زندانیان، تأمین امنیت مرزی، مبارزه با گروه‌های هراس‌افکن، گسترش همکاری‌های اقتصادی و به‌ویژه بررسی وضعیت معدن طلای بدخشان متمرکز بوده است.
به گفته منابع، طالبان نیز در برابر، بار دیگر موضوعاتی مانند به‌رسمیت‌شناسی، تقویت روابط دوجانبه و تحویل سفارت افغانستان را مطرح کرده‌اند؛ موضوعاتی که هیئت تاجیکستان تاکنون واکنش جدی نسبت به آنها نشان نداده است.
این دیدارها در حالی انجام می‌شود که فعالان حقوق‌بشر هشدار داده‌اند هرگونه تعامل بین‌المللی با طالبان نباید به قیمت نادیده‌گرفتن وضعیت حقوق‌بشری مردم افغانستان تمام شود. آنان تأکید دارند که جامعه جهانی باید در هر نوع مذاکره یا همکاری با طالبان، حقوق و آزادی‌های شهروندان افغانستان را در اولویت قرار دهد.
