هیأت بلندپایه تاجیکستان برای گسترش روابط با طالبان وارد کابل شد

یک هیأت متشکل از مقام‌های ارشد امنیتی و وزارت امور خارجه تاجیکستان امروز شنبه، ۲۴ عقرب، وارد کابل شد.

تلویزیون ملی تحت اداره طالبان گزارش داد که محور اصلی این سفر «گسترش روابط سیاسی، اقتصادی و امنیتی میان افغانستان و تاجیکستان» است.

بر اساس این گزارش، هیأت تاجیکستانی با مقام‌های طالبان درباره همکاری‌های آینده، موضوع سفارت افغانستان در دوشنبه و چندین موضوع دیگر گفت‌وگو خواهد کرد. این نخستین سفر مقام‌های ارشد تاجیکستان به افغانستان پس از بازگشت دوباره طالبان به قدرت است.

با این حال، تاجیکستان پس از بازگشت طالبان همواره نگرانی‌های امنیتی خود را از افغانستان مطرح کرده و پیش‌تر در چارچوب سازمان پیمان امنیت جمعی، طرح تقویت مرزهای مشترک را ارائه و تصویب کرده بود.

در همین حال، جریان‌ها و جبهه‌های مخالف طالبان، از جمله جبهه مقاومت به رهبری احمد مسعود، در دوشنبه دفاتر رسمی دارند و گهگاه حملاتی علیه مواضع طالبان در افغانستان انجام می‌دهند، موضوعی که پیچیدگی امنیتی روابط دو کشور را افزایش می‌دهد.