تاجیکستان: دو حمله مرزی از خاک افغانستان ۱۰ کشته و زخمی برجا گذاشت

ریاست‌جمهوری تاجیکستان اعلام کرده است که طی هفته گذشته در دو مورد تیراندازی از داخل خاک افغانستان به سوی قلمرو این کشور، پنج تن کشته و پنج نفر دیگر زخمی شده‌اند. این خبر در بیانیه‌ای که روز دوشنبه، ۱۰ قوس، منتشر شد، اعلام گردید.

براساس این بیانیه، امامعلی رحمان، رئیس‌جمهوری تاجیکستان، در نشست ویژه با مقام‌های امنیتی، وضعیت مرزهای جنوبی این کشور را بررسی کرده و این رویدادها را «غیرقانونی و تحریک‌آمیز» توصیف کرده است. او به نهادهای مسئول دستور داده تا برای جلوگیری از تکرار چنین حوادثی «تدابیر مؤثر» روی‌دست بگیرند.

در خبرنامه ریاست‌جمهوری تاجیکستان، به هویت قربانیان و زمان دقیق وقوع این تیراندازی‌ها اشاره‌ای نشده است.

این حوادث در حالی گزارش می‌شود که وزارت خارجه تاجیکستان روز چهارشنبه، ۵ قوس، اعلام کرده بود سه کارگر یک شرکت چینی در حمله‌ای مسلحانه و پهپادی از داخل خاک افغانستان در منطقه ختلان کشته شده‌اند. به گفته مقام‌ها، این حمله بر اردوگاه کارکنان شرکت «ال‌ال‌سی شاهین اس‌ام» در محدوده پاسگاه مرزی «استقلال» از واحد مرزی «یول» انجام شده و مهاجمان از یک پهپاد حامل نارنجک و نیز سلاح گرم استفاده کرده‌اند.

وزارت خارجه تاجیکستان این حمله را محکوم کرده و تأکید نموده است که با وجود تلاش‌ها برای تأمین امنیت در نوار مرزی با افغانستان، «گروه‌های جنایتکار مستقر در خاک افغانستان» همچنان به اقدامات بی‌ثبات‌کننده ادامه می‌دهند. این وزارت از طالبان خواسته تا برای حفظ ثبات و امنیت در مرز مشترک دست به «اقدامات مؤثر» بزنند.

براساس گزارش‌ها، این رویداد در نزدیکی یکی از نقاط حساس مرزی رخ داده است؛ مرزی به طول بیش از ۱۳۵۰ کیلومتر که به‌دلیل حضور شبکه‌های مسلح و گروه‌های جنایتکار، از ناامن‌ترین مرزهای آسیای مرکزی محسوب می‌شود.

دولت تاجیکستان تاکنون نام هیچ گروهی را که مظنون به انجام این حملات باشد، افشا نکرده است. این کشور پس از روی‌کارآمدن دوباره طالبان در سال ۲۰۲۱ بارها نسبت به افزایش تهدیدهای امنیتی در مرزهای جنوبی خود هشدار داده است.

چین به‌عنوان یکی از بزرگ‌ترین سرمایه‌گذاران در پروژه‌های زیربنایی و معدنی تاجیکستان، حضور گسترده‌ای در مناطق مرزی دارد و بسیاری از شهروندان چینی در همین مناطق کوهستانی نزدیک به افغانستان فعالیت می‌کنند.