طالبان: عاملان حمله به شهروندان چینی در تاجیکستان به‌دنبال بی‌ثباتی منطقه‌اند
وزارت خارجه اداره طالبان با صدور بیانیه‌ای، حمله مسلحانه بر سه شهروند چینی در ولایت ختلان تاجیکستان را محکوم کرده و اعلام کرد که بر اساس اطلاعات آنان، این اقدام از سوی گروه‌هایی انجام شده که به «ایجاد ناامنی، بی‌ثباتی و بی‌اعتمادی میان کشورهای منطقه» می‌پردازند.
وزارت خارجه تاجیکستان نیز گفته است که این سه نفر در نتیجه حمله مسلحانه و پهپادی از خاک افغانستان در ختلان کشته شده‌اند. به گفته مقام‌ها، حمله بر اردوگاه کارکنان شرکت «ال‌ال‌سی شاهین اس‌ام» در محدوده پاسگاه مرزی «استقلال» از واحد مرزی «یول» انجام شده و شامل استفاده از هواپیمای بدون سرنشین حامل نارنجک و سلاح گرم بوده است.
در بیانیه وزارت خارجه تاجیکستان آمده است که با وجود تلاش‌های این کشور برای حفظ امنیت در مناطق مرزی با افغانستان، «گروه‌های جنایتکار مستقر در خاک افغانستان» همچنان به اقدامات بی‌ثبات‌کننده ادامه می‌دهند و از طالبان خواسته‌اند تا «اقدامات مؤثر» برای تأمین ثبات و امنیت مرز مشترک انجام دهند.
مقام‌های تاجیکستان تاکید کرده‌اند که این رویداد در نزدیکی یکی از نقاط حساس مرزی رخ داده؛ مرزی که بیش از ۱۳۵۰ کیلومتر طول دارد و به دلیل حضور شبکه‌های مسلح و گروه‌های جنایتکار، یکی از ناامن‌ترین مرزهای آسیای مرکزی محسوب می‌شود. با این حال، نام هیچ گروه مظنون فاش نشده است.
در مقابل، وزارت خارجه طالبان اعلام کرده است که برای شناسایی عاملان این حادثه آماده همکاری کامل با دولت تاجیکستان است و آمادگی خود را برای تبادل اطلاعات، همکاری فنی و ارزیابی‌های مشترک اعلام کرده است.
پس از بازگشت طالبان به قدرت در سال ۲۰۲۱، تاجیکستان بارها درباره افزایش تهدیدهای امنیتی در مرزهایش هشدار داده است. چین به‌عنوان یکی از سرمایه‌گذاران بزرگ در پروژه‌های استخراج و زیرساختی تاجیکستان، حضور گسترده‌ای در مناطق کوهستانی نزدیک مرز افغانستان دارد و سال گذشته نیز یک کارگر چینی در حمله‌ای مشابه جان خود را از دست داده بود.
