گفت‌وگوهای طالبان و هیأت تاجیکستان درباره‌ی گسترش همکاری‌های اقتصادی
وزارت خارجه‌ی طالبان اعلام کرده است که هیأتی از تاجیکستان در سفر به کابل با امیرخان متقی، وزیر خارجه‌ی طالبان، درباره‌ی تقویت و گسترش مناسبات دوجانبه به‌ویژه همکاری‌های اقتصادی گفت‌وگو کرده است.
ضیاءاحمد تکل، معاون سخن‌گوی وزارت خارجه‌ی طالبان، روز دوشنبه، ۲۶ عقرب، گفت که این هیأت به ریاست نماینده‌ی خاص تاجیکستان و با حضور مقام‌هایی از ادارات مختلف آن کشور به کابل آمده است.
به‌گفته‌ی تکل، متقی در دیدار با این هیأت تأکید کرده است که طالبان در پی گسترش روابط حسنه و همسایه‌داری نیک با تاجیکستان است و روابط دو کشور در حوزه‌های مختلف در حال توسعه میباشد. او ابراز امیدواری کرده است که «در آینده‌ی نزدیک شاهد پیش‌رفت‌های چشم‌گیر در مناسبات میان دو کشور برادر و همسایه» باشند.
هیأت تاجیکستان نیز اطمینان داده است که دو کشور می‌توانند در عرصه‌های گوناگون همکاری‌های نزدیک داشته باشند. دو طرف بر ادامه‌ی چنین نشست‌ها و سفرهای رسمی تأکید کرده‌اند.
تاجیکستان از همسایه‌های شمالی افغانستان است که تاکنون حکومت طالبان را به‌رسمیت نشناخته است و روابط محدودی با این گروه داشته است. سفارت افغانستان در دوشنبه همچنان در اختیار دیپلمات‌های حکومت پیشین قرار دارد.
تاجیکستان همچنین میزبان دفتر گروه‌های مخالف طالبان از جمله «جبهه‌ی مقاومت ملی افغانستان» است و بارها نگرانی خود را از فعالیت گروه‌های تروریستی و افزایش قاچاق مواد مخدر در شمال افغانستان ابراز کرده است.
